'പ്രായത്തിൽ ഇളയതാണെങ്കിലും എന്റെ ചേച്ചിയായി അഭിനയിച്ചു', സ്വാസികയെക്കുറിച്ച് ദുൽഖർ

'സിനിമയിൽ എന്റെ ചേച്ചിയായിട്ടാണ് സ്വാസിക അഭിനയിക്കുന്നത്. പക്ഷേ അവർക്ക് എന്നേക്കാൾ പ്രായം കുറവാണ്. എന്നിട്ടും ഈ വേഷം ഏറ്റെടുത്തതിന് നന്ദി സ്വാസിക.'

ദുൽഖർ സൽമാനെ നായകനാക്കി പവൻ സാദിനേനി സംവിധാനം ചെയ്യുന്ന ചിത്രമാണ് ‘ആകാശംലോ ഒക താര’. സിനിമയിൽ ദുൽഖറിന്റെ ചേച്ചിയായി സ്വാസികയും എത്തുന്നുണ്ട്. സ്വാസിക തനിക്ക് പ്രായത്തിൽ ഇളയതാണെങ്കിലും സിനിമയിൽ ചേച്ചിയുടെ വേഷം ചെയ്യാൻ തയ്യാറായെന്നും വളരെ സ്വാഭാവികമായ അഭിനയമാണ് അവരുടേതെന്നും ദുൽഖർ പറഞ്ഞു.

‘സിനിമയിൽ എന്റെ ചേച്ചിയായിട്ടാണ് സ്വാസിക അഭിനയിക്കുന്നത്. പക്ഷേ അവർക്ക് എന്നേക്കാൾ പ്രായം കുറവാണ്. എന്നിട്ടും ഈ വേഷം ഏറ്റെടുത്തതിന് നന്ദി സ്വാസിക. നിങ്ങളോടൊപ്പമുള്ള ഓരോ ദിവസവും ഷൂട്ടിങ് ചെയ്യുന്നത് നല്ല അനുഭവമായിരുന്നു. നിങ്ങളുടെ അഭിനയം അത്രത്തോളം വിശ്വസനീയമായതുകൊണ്ട് ഞാൻ ശരിക്കും നിങ്ങളുടെ അനിയനാണെന്ന് തോന്നി പോയി. അത്രയും മികച്ച അഭിനേത്രിയാണ് നിങ്ങൾ,’ ദുൽഖർ പറഞ്ഞു.

സന്ദീപ് ഗണ്ണവും രമ്യ ഗണ്ണവും ചേർന്ന് നിർമ്മിക്കുന്ന ചിത്രം നവംബർ 20ന് ആഗോളതലത്തിൽ തിയേറ്ററുകളിലെത്തും. ഗീത ആർട്സ്, സ്വപ്ന സിനിമ, ലൈറ്റ്ബോക്സ് മീഡിയ എന്നീ ബാനറുകൾ സംയുക്തമായാണ് ചിത്രം അവതരിപ്പിക്കുന്നത്. ദുൽഖർ സൽമാൻ്റെ വേഫെറർ ഫിലിംസ് ആണ് ചിത്രം കേരളത്തിലെത്തിക്കുന്നത്.

പവൻ സാദിനേനിയുടെ വ്യത്യസ്തമായ കഥപറച്ചിൽ ശൈലിയിൽ ഒരുങ്ങുന്ന ചിത്രത്തിൽ ദുൽഖർ സൽമാൻ കൃഷ്ണ എന്ന കഥാപാത്രത്തെയാണ് അവതരിപ്പിക്കുന്നത്. പുതുമുഖം സാത്വിക വീരവല്ലിയാണ് ചിത്രത്തിലെ കല്പന എന്ന നായികാ കഥാപാത്രത്തെ അവതരിപ്പിക്കുന്നത്. സമൂഹം മുന്നിൽ വെക്കുന്ന അതിർവരമ്പുകൾ മറികടന്ന് സ്വന്തം സ്വപ്നങ്ങളിലേക്ക് മുന്നേറാൻ ശ്രമിക്കുന്ന കല്പനയ്ക്ക് പിന്തുണയുമായി നിൽക്കുന്ന കൃഷ്ണയുടെ കഥയാണ് ചിത്രം പറയുന്നത്. പ്രണയവും വൈകാരിക മുഹൂർത്തങ്ങളും ഫീൽ ഗുഡ് ഘടകങ്ങളും കോർത്തിണക്കിയാണ് സിനിമ ഒരുക്കിയിരിക്കുന്നത്.

തമിഴ് നടി ശ്രുതി ഹാസൻ ചിത്രത്തിൽ രോഹിണി എന്ന ശക്തമായ കഥാപാത്രത്തെ അവതരിപ്പിക്കുന്നു. കേന്ദ്ര കഥാപാത്രങ്ങളുടെ ജീവിതത്തിൽ നിർണായകമായ സ്വാധീനം ചെലുത്തുന്ന വേഷമാണ് രോഹിണിയുടേത്. റൂഹാനി, മുരളി ശർമ, സ്വാസിക എന്നിവരും ചിത്രത്തിലെ പ്രധാന താരനിരയിലുണ്ട്. ‘കുട്ടി കുട്ടി പൂവേ’, ‘കണ്ണേ കണ്ണേ’ എന്നീ ഗാനങ്ങളും ഇതിനോടകം ശ്രദ്ധ നേടിയിട്ടുണ്ട്. ജി.വി. പ്രകാശ് കുമാറാണ് ചിത്രത്തിന് സംഗീതം ഒരുക്കുന്നത്.

Content Highlights: Actor Dulquer Salmaan has praised Swasika for her performance, highlighting how convincingly she portrayed the role of his elder sister despite being younger than him in real life.

To advertise here,contact us